Ընթերցանություն
Գլխավոր>Բարի կամք> Հարության տոնը ծերերի համար. մեկօրյա, թե՞ շարունակական ուրախություն

Հարության տոնը ծերերի համար. մեկօրյա, թե՞ շարունակական ուրախություն

Հարության տոնը ծերերի համար. մեկօրյա, թե՞ շարունակական ուրախություն

Մեր միջավայրում նկատելի է, որ Սուրբ Զատիկը մեկ կամ ավելի շատ երկօրյա ուրախության տոն է շատերի համար, այնինչ այն շարունակական է, քանի որ Սուրբ Զատկից մինչև Հոգեգալուստ հարության օրեր են` տոնական, ուրախ օրեր: Այդ ուրախությունը յուրաքանչյուր մարդ յուրովի է ապրում. երեխաների համար այն ձվակռիվն էր, որոշների համար զատկական սեղանի շուրջ հավաքվելը, ոմանց համար Մեծ պահքից հետո, պատարագին մասնակցելով, հաղորդություն ստանալը: Հետաքրքիր էր իմանալ նաև արդյոք ուրախության առիթ էր Սուրբ Զատիկը Հարավ-արևմտյան թաղամասի «Վետերան» օթևանի մեծահասակների համար: Որոշները տանը չէին, մի բնակիչ հյուր ուներ` չկարողացավ խոսել, մի պապիկ էլ վատառողջ լինելու պատճառով չխոսեց: Իսկ յոթանասունհինգամյա Արաքսյա տատիկը հարության ողջույնով դիմավորեց և պատմեց, որ մանկության տարիներին Սուրբ Զատիկը իր համար միմիայն ուրախության և երջանկության օրեր են եղել, բայց հիմա չկա այդ ուրախությունը, գուցե պատճառը իր տարիքն է, հիվանդությունը կամ ֆինանսական վիճա՞կը. չգիտի: Նա նշեց, որ այս տարի Սուրբ Զատկի տոնին մասնակցել է Սուրբ Երրորդություն եկեղեցում պատարագի, այնուհետև պատրաստել է զատկական բոլոր ճաշատեսակները: Արաքսյա տատին հավատում է Աստծուն, նեղության ժամանակ Աստված միշտ օգնում է իրեն, ամեն գիշեր քնելուց առաջ «Հայր մեր» աղոթքն է ասում, աղոթում է իր բոլոր հարազատների համար, ունի Նոր կտակարան, որ կարդում է, բայց արևմտահայերեն ուղղագրության պատճառով դժվարությամբ է հասկանում: Հավատում է նաև Քրիստոսի Հարությանը, համարելով այն յուրահատուկ դեպք, անցյալում կատարված հրաշք, բայց չի հավատում մեռելների հարությանը: Պատճառն այն է, որ երիտասարդ տարիներին քսանմեկամյա եղբորն է կորցրել (բանակում վթարի ենթարկվելով մահացել է): «Եթե մեռելների հարություն կա, ինչո՞ւ եղբայրս հարություն չառավ», - հարցնում է նա: Միևնույն ժամանակ Արաքսյա տատին ժամանակ առ ժամանակ հոգեհանգիստ է պատվիրում իր մահացած հարազատների համար:
Վաթսունմեկամյա տիկին Զինան ինչպես հարկն է, նշել է Սուրբ Զատիկը` գնացել է եկեղեցի, մոմ է վառել, պատրաստել է զատկական ավանդական բոլոր ճաշատեսակները: Աստվածաշունչ շատ քիչ է կարդում, հավատում է Քրիստոսի Հարությանը, բայց ինչպես Արաքսյա տատին, այնպես էլ ինքը, չի հավատում մեռելների հարությանը:
Յոթանասունմեկամյա Եպրաքսյա տատիկը նշեց, որ իր համար Սուրբ Զատիկը ամենամեծ սրբությունն է, քանի որ մեր փրկիչը` Հիսուս Քրիստոս, խաչվեց բոլորի համար և երեք օր հետո հարություն առավ: Դա ամենամեծ և ամենաթանկ պարգևն է իր համար: Նա զատկական բոլոր ճաշատեսակները պատրաստում է, քանի որ նրանցից յուրաքանչյուրն իր խորհուրդն ունի և գտնում է, որ Սուրբ Զատիկը միայն ուտելով չի սահմանափակվում: Կարևորը, որ մարդը մաքուր լինի սուտ խոսելուց, ագահությունից, բամբասելուց, գողությունից, չարությունից: Աստված սեր է և այդ սերը մարդու մեջ պետք է բնակվի, քանի որ մարդուն հենց դա է հարկավոր: Եպրաքսյա տատին ամեն կիրակի հաճախում է Սուրբ Երրորդություն եկեղեցի պատարագի, ուրախությամբ նշեց, որ թե́ Ծաղկազարդի, թե́ Ավագ շաբաթվա և թե́ Սուրբ Հարության բոլոր արարողություններին մասնակից է եղել: Սուրբ զատկական տոնը և ուրախությունը շարունակելի է իր համար մինչև կյանքի վերջ: Իսկ մեռելների հարությանը նա հավատում է անկասկած, այդ մասին նա գիտի Աստվածաշնչից, որն իր ամենասիրելի և ամենօրյա ընթերցանության գիրքն է:
Սիմոն պապիկի համար այս տոնը դարերից եկած մի սրբություն է, հարգարժան մի տոն քրիստոնեության համար: Երբ կենդանի էր իր կինը , նրանք հաճախ էին գնում Սուրբ Սարգիս եկեղեցի, ճրագ էին տուն բերում, բայց հիմա տկարացել է, չի կարողանում հաճախ այցելել եկեղեցի: Ունի Աստվածաշունչ, հավատում է Քրիստոսի վերադարձից հետո մեռելների հարությանը և անհամբեր սպասում է այդ օրվան, քանի որ կտեսնի իր տղային և կնոջը: Ինչպես ինքը նշեց` առանց հարության հույսի անհնար է ապրել:
Հանդիպելով այս մեծահասակներին ` հիշեցի աղվեսի և գայլի մասին մի առակ, որում պատմվում է, թե գայլը, որն ընդհանրապես որևէ մարդու չէր տեսել, աղվեսին խնդրում է, որ իրեն իսկական մարդ ցույց տա: Երբ իրենք քայլում են ճանապարհով, հանդիպում են մի զառամյալ մարդու, նայելով ծերին`գայլն աղվեսին հարցնում է. «Սա՞ է իսկական մարդը»: «Ո ́չ,_պատասխանում է աղվեսը,- նա մարդ է եղել անցյալում»: Ակնհայտ է, որ այս մեծահասակները արժանանում են աղվեսի նման մտածելակերպ ունեցող վերաբերմունքի` առաջին հերթին իրենց հարազատների ու մարդկանց, ապա նաև` պետության կողմից:

Կարինե Սուգիկյան
ՍԵԵՄ լրագրության խմբակ

Դիտվել է 7328
2012.04.16
Հարց Քահանային
Ինչպե՞ս
Հայտարարություն
Լսել քարոզներ
Հղումներ հոգևոր էջեր
Ընթերցել նաև
Website by A. Grigoryan
aramgrig@hotmail.com
Mail
+374 93532025
Tel.